ಒಮ್ಮೆ

ಗುರು ಸಾಕ್ಷಾತ್ ಪರಬ್ರಹ್ಮ
ವಿದ್ಯಾರ್ಥಿಯ ಅಧ್ಯಯನದಿ ಒಮ್ಮೆ
ಭಕ್ತಿಯ ನವ್ಯ ಚಿಂತನ !!

ಭವತಿ ಭಿಕ್ಷಾಂ ದೇಹಿ
ಭಿಕ್ಷಾರ್ಥಿಯ ಉದರದಲ್ಲಿ ಒಮ್ಮೆ
ಬಯಕೆಯ ಭವ್ಯ ಭೋಜನ !!

ಮಾಂಗಲ್ಯಂ ತಂತುನಾನೇನ
ಕನ್ಯಾರ್ಥಿಯ ಕನಸಲ್ಲಿ  ಒಮ್ಮೆ
ಸಂಕೋಚದ ನವ್ಯ ನರ್ತನ !!

ಭಜ ಗೋವಿಂದಂ ಭಜ ಗೋವಿಂದಂ
ಮೋಕ್ಷಾರ್ಥಿಯ ಮನಸಲ್ಲಿ ಒಮ್ಮೆ
ಸಂಸಾರದ ನಿತ್ಯ ಜೀವನ !!

ನಯನ

ಅಕ್ಕ ಪಕ್ಕವೇ ಮನೆ ಮಾಡಿರುವ
ಒಂದರಂತೆ ಇನ್ನೊಂದು ಕಂಗೊಳಿಸುವ
ಅನ್ಯೋನ್ಯತೆಗೆ ಬೆರಗಾಗಿ ನಾನೇನ ಕರೆಯಲಿ ?

ಬಾಹ್ಯ ಸೌಂದರ್ಯಕ್ಕೆ ನೀನೆ ಸಾಕ್ಷಿ
ಮನಸಿನ ಆಂತರ್ಯಕ್ಕೆ ನೀನಲ್ಲವೇ ಅಕ್ಷಿ 
ಸುಖ ದುಃಖದಲ್ಲೂ ನೀನು ಸಾಮಾನ್ಯ ಪಕ್ಷಿ   !!

ನಕ್ಕಾಗ ಶೋಬಿಸುವ ಅತ್ತಾಗ ಮರಗುವ
ಸುತ್ತಲೂ ನೋಡುವ ನಿನ್ನಯ ಹೊಳಪಿನ ಕಾಂತಿಯ
ತುಂಟ ಕಣ್ಣಿನ ನೋಟಕ್ಕೆ ತಟ್ಟನೆ ಮನಸೋಲದವರಾರು ?

ಮೊದಲರಾತ್ರಿ

ನನ್ನದೇ ಮಂಚದಲಿ 

ನಮ್ಮನೆಯ ಹಾಸಿಗೆಯಲಿ 

ಮಲ್ಲಿಗೆಯ ಬೆಳಸಿದವರಾರು ?

 

ನವಿಲಿನ ನಡಿಗೆಯಲಿ
ನುಡಿಮುತ್ತು ಸುರಿಸುತ್ತ
ಮೊದಲರಾತ್ರಿಗೆ ಬಂದವಳಾರು? 

 

ನನ್ನುಸಿರ ತೇರಿನಲಿ 

ನನ್ನಾಕೆಯ ಬೆವರಿನಲಿ 

ಸುಗಂಧವ ಸುರಿಸಿದವರಾರು ?

 

ನಾನೊಂದು ಕೇಳಿರಲು

ನೂರೊಂದು ಕೊಟ್ಟವಳ

ಮೈ ಬಿಸಿಮಾಡಿಸಿದವರಾರು ?

 

ನೂರಾರು ಕನಸಿನಲಿ  

ನಗುತ ಬಂದವಳ ಬಳಿಯಲಿ

ಸುಮ್ಮನೆ ಮಲಗುವವರಾರು ?

 

 

 

ಘಟನೆಗಳು

ಕಾಲದ ಪರಿಧಿಯಲಿ ಮರೆತೇ ಹೋದ
ಕೆಲವೊಂದು ದಿನಗಳು ಚಿಟ್ಟೆಯಂತೆ
ಹಾರಿ ಬಂದು ನೆನಪಿಸಿ ಹೃದಯವನ್ನೇ
ಎಡಬಿಡದೆ ಘಾಸಿಗೊಳಿಸುತಿದೆ ಕಾಣ !!

ಹೆಜ್ಜೆ ಹೆಜ್ಜೆಯಲ್ಲೂ ಅವಳ ಗೆಜ್ಜೆ ಸದ್ದು
ಕ್ಷಣ  ಕ್ಷಣಕ್ಕೂ ಬೀಳುವ ಬಳೆಗಳ ಗುದ್ದು
ಹತ್ತಿರ ಬಂದಾಗ ಬಿಸಿ ಉಸಿರ  ಮುದ್ದು
ಕಣ್ಣುಗಳೇ ವಂಚಿಸಿ ನೋಡುತಿತ್ತು ಕದ್ದು !!

ಪ್ರೇಮಕಾವ್ಯದಲ್ಲೂ ಇರಲಾರದ ವಿರಹ
ಇರುವೆಗೂ ತಿಳಿಯದ ನಮ್ಮ ಕಲರವ
ಮುಂಜಾವಿನ ಮಂಜಿನಂತೆ ಹನಿಗಳು
ಮುಖದ ತುಂಬಾ ಜೇನಿನ ಇಬ್ಬನಿಗಳು !!

ಒಂದೇ ಎರೆಡೆ ಅನುದಿನ ಇಂಥಹವು
ಅನೇಕ ಸಿಹಿನೆನಪುಗಳ ಮೆರವಣಿಗೆಯು
ವಾಸ್ತವಕ್ಕೂ,ಕಲ್ಪನೆಗೂ ಮಧ್ಯೆ ಅನಂತ
ವ್ಯತ್ಯಾಸ ತಂದು ಸಾಗುತಿರೆ ದಿಗಂತಕೆ !!

ಮುಪ್ಪು

ಬಾಳ ಇಳಿ ಸಂಜೆಯಲಿ
ಮೂಡಿದೊಂದೊಂದು ಕನಸು
ಮನಸಿನ ಸುಪ್ತ ಭಾವನೆಯ
ಅಲ್ಲೋಲ ಕಲ್ಲೋಲ ಗೊಳಿಸಿತೇಕೆ ?

ತುಂಬಿದ ಮನೆಗೆ ಕತ್ತರಿ
ನುಂಗಲಾರದ ತುತ್ತು ತಟ್ಟೆಯಲಿ
ಆಳುವ ನನ್ನೀ ಕೈಗಳೇ ಅಂದೇಕೆ
ಅಳುವ ಕಣ್ಣಿನ ಮೇಲೆ ನರ್ತಿಸುತಿದೆ ?

ಆರದ ಆಸ್ತಿಯ ಬಯಸದೆ
ಕೊಟ್ಟಮೆಲೂ, ತೀರದ ಆಯುಷ್ಯಕ್ಕೆ
ಜರಿದು ಮೂಲೆಗುಂಪಾಗಿಸುವ ಪ್ರಯತ್ನಕೆ
ಹಿರಿಯ ಜೀವವದು ಕುಗ್ಗಿ ನೊಂದಿತೇಕೆ ?

ಮುಪ್ಪಿನ ಬಂದನಕ್ಕೆ ನೆಚ್ಚಿ
ಮಕ್ಕಳ ಪ್ರೀತಿಯ ಆರೈಕೆಯಲಿ
ಉಳಿದ ನಾಲ್ಕುದಿನ ಕಳೆಯುವ
ಸದ್ಬಯಕೆಗೆ ತಿಲಾಂಜಲಿ ಬಿಟ್ಟಿರಬೇಕೆ ?

ಸಂಸ್ಕೃತಿ

ಯುಗವೊಂದು ಕಳೆದಂತೆ ಕಾಣಿಪುದು ನೋಡಿರ
ಮಗುತಾನು ಬದಲಾಗಿಪುದು ವೇಷಭೂಷಣದಲಿ
ನಡುನಡುವೆ ಸುಳಿದಾಡುವ ಆಂಗ್ಲಪದ ಪುಂಜದಲಿ
ಹೆತ್ತವರ ದೂರಮಾಡಲು ಹೇಸದ ಕಾಲಘಟ್ಟದಲಿ !

ವ್ಯಕ್ತಿ ವ್ಯಕ್ತಿಯ ಮಧ್ಯೆ ನಂಬಲಾರದ ಬದಲಾವಣೆ
ಸಾಗುತಿಹ ಪಾಶ್ಚಿಮಾತ್ಯಕ್ಕೆ ನಮ್ಮ ಹೊಂದಾಣಿಕೆ
ಮನೆಯ ಗೋಡೆಯ ತುಂಬಾ ವಾಸ್ತು ಲಾಂಛನ
ಕಾಣದಾಗಿದೆ ಪ್ರೀತಿ ಪಾತ್ರರ ಛಾಯಚಿತ್ರ ಪ್ರದರ್ಶನ !

ದೇವರಿಗೂ ಸಿಗದಾಗಿದೆ ಮನೆಯ ಮೂಲೆಯ ಜಾಗ
ಶೌಚಾಲಯಕ್ಕೆ ಮಾತ್ರ ಪ್ರತಿ ಕೋಣೆಯಲ್ಲೂ ವ್ಯವಸ್ತೆ
ಮನೆಯ ಹಿಂದಿನ ಹಿತ್ತಲು ಕತೆಗೆ ಮಾತ್ರ ಸೀಮಿತ
ತುಳಸಿ ಗಿಡಕ್ಕೆ ಜಾಗ ಸಿಗುವುದೇ ಒಂದು ಸೋಜಿಗ !

ಸದಾ ವಿಚಿತ್ರವೆನಿಸುವ ಜೀವನ ಪಂಜರವಿದು ಕಾಣ
ಅನುಕಂಪ ಆತ್ಮೀಯತೆ ತಿಳಿಯದ ಮನುಜ ಗಣ
ಕಾಂಚಾಣದ ಹಿಂದೆ ಓಡುತಿದೆ ಮೌಲ್ಯದ ಗುಣ
ಏಂದು ಬದಲಾಗುವುದೋ ಈ ಭಾರತೀಯನ ಮನ !!