ಮನಸೆಂಬ ನಿಮ್ಮ ಜೋಗಯ್ಯ

ಕವಲೊಡೆದ ದಾರಿಯಲಿ 

ಸರಿ ತಪ್ಪುಗಳ ಮೂಟೆ ಹೊತ್ತು 

ಸಾಗುವವನು ನಾನಯ್ಯ ನಿಮ್ಮ ಜೋಗಯ್ಯ !!

 

ಅವಶೇಷದ ಹಾದಿಯಲಿ  

ಪಾಪ ಪುಣ್ಯಗಳ ಲೆಕ್ಕ ಕೊಟ್ಟು 

ಕರೆದೊಯ್ಯುವ ನಮ್ಮನ್ನು ನಿಮ್ಮ ಜೋಗಯ್ಯ !!

 

ಜೀವನದ ಜಂಜಾಟದಲಿ

ಅಂತೆ ಕಂತೆಗಳ ಕಣ್ಣು ತಪ್ಪಿಸಿ 

ಮುಕ್ತಿ ತೋರುವನಮ್ಮ ನಿಮ್ಮ ಜೋಗಯ್ಯ !!

 

ನಾಲ್ಕುದಿನದ ಬಾಳಲ್ಲಿ

ಹರಿ ಹರರ ನೆನಪಿಸಿ ಮಾರ್ಗ 

ತೋರುವವನು ನಾನಯ್ಯ ನಿಮ್ಮ ಜೋಗಯ್ಯ !!    

 

 

 

ನೋವು

ಕಾದಿರುವ ಪ್ರೀತಿ ಪಾತ್ರರಿಗದುವೆ

ಕೊಡಬಾರದ ನೋವು

ಕೊಟ್ಟ ಮೇಲೆ ತಪ್ಪದೆ ಕಾಡುವುದು 

ಅಪವಾದದ ಕಾವು !!

ಭಾರವಾದ ಮನಸ್ಸಿಗೆ ತಾಳಲಾರದ 

ಅಪಸ್ವರದ ಬೇನೆ
ಸಂಸಾರ ಸಾಗರದಲ್ಲಿ ಆತಂಕಕೆ
ಇನ್ನೆಲ್ಲಿದೆ ಕೊನೆ !!

ಯೋಚನೆಯ ಗೂಡಿನಲ್ಲಿ ಕಾಣದದು

ನೋವಿನ ಧ್ವನಿ  

ನಿರಂತರ ಸುಳಿದಾಡುತಿದೆ ಮೌನದ 

ಕಣ್ಣೀರಿನ ಹನಿ !!

ನಿಷ್ಠೂರದ ಅಗ್ನಿಯ ಜ್ವಾಲೆಯದುವೆ 

ಸದಾ ನನ್ನ ಸುತ್ತಾ

ಇನ್ನಾದರೂ ಕೊನೆಯಾಗಲಿ ಎಂದೂ

ಸಿಗದ ಮುಕ್ತ ಮುಕ್ತಾ !!

ಬಂಧನ

ಸುಲಲಿತ ಮಾತುಗಳ ಮಧ್ಯ
ಅಸ್ಪಷ್ಟ ಚಿತ್ರಣ
ಭಿಗಿಯಾದ ಬಾಹುಗಳ ಮಧ್ಯ
ಅಭಯ ಮುದ್ರಣ

ಕಾರುಣ್ಯ ನಿಧಿಯಂತೆ ಶೋಭಿಸುವ
ನಿನ್ನಯ ನಯನ
ಕುತೂಹಲ ಕೆರಳಿಸುವ ಮೌನ
ಮುದ್ರಿತ ಸಂಭಾಷಣ

ಕಂಪಿಸುವ ಹೃದಯದಿ ಮೆಲ್ಲನೆ
ಬಯಕೆಯ ಆಗಮನ
ಕ್ಲಿಷ್ಟ ಸಮಸ್ಯೆಯ ಬಗೆಹರಿಸುವ
ಪ್ರೀತಿಯ ಆಲಿಂಗನ

ಪ್ರೇಮಾಂಕುರ ಚಿಗುರೋಡೆಯುತಿದೆ
ನಮ್ಮ ನಡುವಣ
ನವಜಾತ ಸತಿಪತಿ ಸಂಬಂಧದ ಈ
ಮಧುರ ಬಂಧನ

ಬಂದಿಹರು

ನೆನಪುಗಳ ತೋಟದಲಿ ನನ್ನೊಡನೆ ಸುಳಿವುವವರು
ನನ್ನವರು, ನನ್ನ ಗೆಳೆಯರಿವರು
ಪ್ರತಿ ದಿನವು, ಪ್ರತಿ ಕ್ಷಣವೂ ನನ್ನೊಡನೆ ಕಳೆಯುವರು !!

ನಗುವರು ಸದಾ ನಗಿಸುವರು ದುಃಖವನು ಮರೆಸುವರು
ನನ್ನ ನೆಚ್ಚಿನ ಗೆಳೆಯರವರು
ಹರಿಸುವರು ಸದಾ ಹಾರೈಸುವರು,ಕಷ್ಟದಲಿ ಕೈ ಜೋಡಿಸುವರು !!

ನನ್ನ ಇಷ್ಟ ಮಿತ್ರರಿವರು ಆಡುವರು ಸದಾ ನಲಿಯುವರು
ಜೀವಕ್ಕೆ ಜೀವ, ಸ್ನೇಹಕ್ಕೆ ಸ್ನೇಹ ಕೊಡುವರಿವರು

ಬರುವವರು ಮರೆಯದೆ ಬಂದಿಹರು
ಕೋಟೇಶ್ವರದಲಿ ನಡೆಯುವ ನನ್ನ ಮದುವೆಗವರು !!