ಮದುವೆ

ಹೇಳುವೆನು ನಿಮಗೊಂದು ಗುಟ್ಟು,
ಆಕೆ ಬರುವಳು ಹೊಸ ಸೀರೆಯುಟ್ಟು,

ಹಣೆಯಲ್ಲಿ ಕೆಂಪು ತಿಲಕವ ನಿಟ್ಟು,
ಮುಡಿಯಲ್ಲಿ ಮಲ್ಲಿಗೆ ಜಡೆಯ ಬಿಟ್ಟು !!

ಕುಲದೇವ ಗುರುನರಸಿಂಹನ ಸ್ಮರಣ,
ಮನದಲ್ಲಿ ಸಂಭ್ರಮದ ಆ ಕ್ಷಣ,
ಬಂಧು ಬಾಂಧವರ ಆಗಮನ,
ಮನೆಯಲ್ಲಿ ಹಬ್ಬದ ವಾತಾವರಣ !!

ಬಾಗಿಲಿಗುಂಟು ತಳಿರು ತೋರಣ,
ಊಟಕ್ಕುಂಟು ಒಬ್ಬಟ್ಟಿನ ಹೂರಣ,
ಮಂಟಪದ ಮುಂದೆ ವರನ ದಿಬ್ಬಣ,
ನಮ್ಮ ಮದುವೆಯೇ ಇದಕ್ಕೆಲ್ಲ ಕಾರಣ !!

ನಮಸ್ಕರಿಸುವೆವು ಗುರುವಿನ ಚರಣ,
ಮೊಳಗಲಿದೆ ವೇದಘೋಷದ ಪಠನ,
ಕೂಡಲಿದೆ ನಮ್ಮಯ ಭಾಗ್ಯದ ಕಂಕಣ,
ಮಿತ್ರ ಬಳಗಕ್ಕೆಲ್ಲ ಇದುವೇ ಆಮಂತ್ರಣ !!